«Мектеп жанындағы интернаты бар жалпы орта білім беретін #6 мектебі» КММ
АУҒАННЫҢ ОТ ЖАЛЫНЫ
Семей қаласының тарихи-өлкетану музейінің Аягөз қаласындағы филиалында 15-ақпан Кеңес әскерінің Ауған жерінен шығарылғанына 33 жыл толуына орай «Ауғанның от жалыны» атты танымдық дәріс өтті. Дәріске "Мектеп жанындағы интернаты бар жалпы орта білім беретін #6 мектебі" КММ 8-сынып оқушылары мен жетекшісі Марал Мұхаметбекқызы қатысты. Ауған оқиғасының тарихи мағыналық ақиқатын ашу, Тәуелсіздік жолында күрескен ағаларымыздың ерлігін кейінгі ұрпаққа үлгі ете отырып, жастарды Отансүйгіштікке, ерлікке баулу, Ауған соғысы ардагерлеріне құрмет көрсету дәрістің негізгі мақсаты болып табылды. Дәріс барысында оқушыларға Аягөз ауданының интернационалист жауынгерлері туралы мәліметтер берілді, сондай-ақ ауған тарихынан сыр шертетін «Отқа оранған он жыл» атты бейнеролик көрсетілді. 1979 жылы Ауғанстан жерінде болған зұлмат соғыста Кеңес әскерлері қайталанбас қаһармандық танытты. Мейлі өзге елде болсын, халықтың тыныштығын қалаған батырларымыздың басым бөлігі сол бір сұм жылдарда майдан даласында қаза тапса, тағы бірі із-түссіз жоғалып кетті. Сол соғысқа Аягөз ауданынан 128 адам аттанып, оның ішінде 2 адам (кіші сержант Қалиасқаров Аманбек, Оспанов Қайрат) қаза тапты, 1 адам (Сергей Васильевич) хабар - ошарсыз кетті. Дәріс соңында орталық алаңда орналасқан ауған соғысына арналған ескерткішіне, тақсыреті мол жылдарға шолу жасалып, ардагерлер рухына тағзым етілді.
Семей қаласының тарихи-өлкетану музейінің
Аягөз қаласындағы филиалы
