« Мұқағали – ғажайып, сыршыл ақын »
« Мұқағали – ғажайып, сыршыл ақын » тақырыбымен мектепішілік Мұқағали оқулары сайысы болып өтті.
Байқаудың мақсаты: 1. Ақиық ақын, артына өшпестей із қалдырған Мұқағали Мақатаевтың ақындық талантын шәкірт жүрегіне ұялату арқылы поэзияны сүюге, оны бағалай білуге, сыршыл да шыншыл ақын өлеңдерінің мәні мен мазмұнына үңілдіруге, рухани танымын кеңейтуге ықпал ету.
2. Ақынның рухани мұрасына деген сүйіспеншілікке, өлеңдері мен әндері арқылы оқушыларды әсемдікке, елжандылыққа тәрбиелей отырып, поэзия әлемінің сырын ашу және ұлттық әдебиетіміз бен мәдениетімізді насихаттауға тәрбиелеу.
Сайысқа 5-11 сынып оқушылары қатысты. Қатысқан оқушылар 7 түрлі бөлім негізінде өз өнерілерін ортаға салды.
І. «Айтып өткен ақында арман бар ма?» Бұл айдарда үміткер М.Мақатаевтың шығармашылығынан жатқа өлеңдерін оқыды
ІІ. «Көкірегімде жыр сәулесі маздайды...» айдарында оқушы өз шығармашылығынан жинағын ұсынып, жүрегіне жақын өлеңінен оқыды.
ІІІ. «Жыр эстафетасы» айдарында үміткерлер «Райымбек, Райымбек!», «Алтай-Атырау» поэмаларын нақышына келтіре оқып жатты .
ІҮ. «Жырлайды жүрек» берілген тақырыпқа өлең құрайды. Сайыскерлер жұрт көңілінен шығардай шумақтарын шығарып туындатты.
Ү. «Сыр сандықты ашып қара, Ашып қара сырласым » айдарында үміткер берілген Мұқағали өлеңдерінің шумақтары бойынша мазмұны мен идеясын ашып, өлең өзегіндегі ой желісімен сөйлеу шеберлігін мен ұтымды жауабымен танылды. ҮІ. «Мұқағали мұрасын кім көп біледі? » деген бөлімінде оқушылар Мұқағали ақын шығармашылығына байланысты сұраққа жауап қайтарды.
ҮІІ. «Ақын мұражайына менің үлесім...» Бұл айдарда оқушы жеке қолынан жасаған бұйымдарын, ақын жайлы ел аузындағы естімеген естеліктерін ұсынып ,қорғады.
Міне, осылайша білімдерін сынаған сайыскерлер ішінен оза шауып бәйге алған оқушыларымыз марапатталды. Ең жоғары ұпайды иеленген 7 «Б» сынып оқушысы Болатова Рақия әділқазы шешімімен «Бас жүлдені» иеленіп, аудандық сайысқа жолдама алды. Осы оқушымыз сайыстың аудандық кезеңінен 1- орын иеленді.
